Konsultazzjonijiet taċ-Ċittadini Ewropej

40 ċittadin Malti, magħżula każwalment, ser jieħdu sehem fl-akbar eżerċiżżju ta’ konsultazzjoni pan Ewropea li qatt sar, is-Sibt 24 u l-Ħadd 25 ta’ Marzu 2007 fir-Radisson SAS Golden Sands Resort & Spa. Dan l-avveniment huwa maħsub biex jassigura li leħen il-pubbliku jinstema’ mill-gvernijiet u dawk li jfasslu l-politika fid-dibattitu attwali dwar il-ġejjieni ta’ l-Unjoni Ewropea.

Dan ser ikun wieħed minn 27 avveniment organizzati f’livell nazzjonali matul Frar u Marzu f’kull Stat Membru ta’ l-UE. Ser jiġu diskussi tliet suġġetti – l-enerġija u l-ambjent, il-familja u s-sigurtà soċjali, u r-rwol globali Ewropew u l-immigrazzjoni

Dawn is-suġġetti ntgħażlu matul l-avveniment li fassal l-aġenda f’Ottubru 2006, li matulu, 200 ċittadin mill-Ewropa kollha, fosthom 8 Maltin, iltaqgħu biex jidentifikaw u jiddiskutu x’tip ta’ Ewropa jridu u l-kwistjonijiet li l-aktar jolqtuhom.

Ir-riżultati tal-konsultazzjonijiet nazzjonali kollha ser jiġu ppreżentati lil dawk li jfasslu l-politika qabel is-Samit ta’ l-UE f’Ġunju meta jiġi diskuss il-futur tat-Trattat Kostituzzjonali.

Il-konsultazzjonijiet taċ-ċittadini Ewropej huma ffinanzjati u organizzati minn konsorzju indipendenti ta’ fondazzjonijiet u organizzazzjonijiet li ma jaħdmux għall-qligħ mill-Ewropa kollha u mmexxija mill-Fondazzjoni tar-Re Baudouin. Huma ko-sponsorjati mill-istrateġija tal-komunikazzjoni tal-Kummissjoni Ewropea “Pjan D”.

Il-Fondazzjoni Temi Zammit qed torganizza l-konsultazzjonijiet f’Malta bil-kollaborazzjoni tal-Forum Malta fl-Ewropa.