|
Vibrazzjonijiet ta' l-idea Ewropea
29/06/07
Il-konkors ta' l-arti Europeanvibes iħeġġeġ liż-żgħażagħ jesprimu l-perċezzjonijiet tagħhom dwar l-Ewropa.
Europeanvibes Hija pjattaforma ta' skambju fuq l-internet imwaqqfa mill-assoċjazzjoni żagħżugħa JEF (Federalisti Żgħażagħ Ewropej) , li toffri spazju liż-żgħażagħ biex jaqsmu l-ideat u l-opinjonijiet tagħhom dwar l-Ewropa. Fis-sit bħalissa hemm konkors li jistieden lill-Ewropej jirrappreżentaw ħajjithom ta' kuljum u x-xewqat għall-ġejjieni bħala ċittadini Ewropej permezz ta' ritratti, filmati u kanzunetti.
Dawk li se jipparteċipaw huma mħeġġa jimmaġinaw ħajjithom f'Ewropa dejjem aktar magħquda. L-ewwel selezzjoni diġà qed isseħħ onlajn, u dawk li jżuru s-sit Europeanvibes jistgħu jħallu kummenti, jiddiskutu l-parteċipazzjonijiet u jivvutaw għal-favoriti.
Id-data ta' għeluq għall-parteċipazzjoni hija l-20 ta' Lulju. L-aħjar biċċiet jispiċċaw f'wirja itinerarja li tibda fi-Brussell u tkopri l-UE kollha. L-avveniment jilħaq il-qofol tiegħu fil-Kungress Ewropew ‘JEF Europe’ li se jsir f'Kopenħagen fil-21 ta' Ottubru.
Il-Europeanvibes hija parti minn kampanja akbar ta' l-UE bl-isem Speak up Europe , li tħeġġeġ dibattitu onlajn u wiċċ imb'wiċċ - u tgħaqqad l-impatt ta' l-għodda ta' l-internet u l-avvenimenti lokali u nazzjonali - ma' l-għan li jingħataw opinjonijiet ferm importanti għal dawk li jieħdu d-deċiżjonijiet fl-Ewropa.
|
|