Aħdem bħala Interpretu Freelance mal-UE

L-interpreti li jagħmlu parti mill-istaff tal-UE huma reklutati permezz ta’ kompetizzjonijiet. Is-sit web tal-Karrieri tal-UE (EPSO) jagħtik aktar informazzjoni dwar il-kompetizzjonijiet miftuħin.

Issib aktar informazzjoni kemm f’Karrieri tal-UE (EPSO), kif ukoll fil-paġna web It-Traduzzjoni fl-Istituzzjonijiet tal-UE.

Għandek tagħti prova tal-esperjenza tiegħek bħala interpretu tal-konferenzi kemm fl-interpretazzjoni simultanja kif ukoll konsekuttiva fil-livell meħtieġ għal laqgħat internazzjonali għal total ta’ mill-inqas 100 jum.

Prova aċċettabbli ta’ esperjenza tinkludi:

• Fotokopji ta’ kuntratti

• Stqarrijiet mill-impjegaturi tiegħek li jispeċifikaw in-numru ta’ ġranet u t-tipi ta’ konferenzi (li jindikaw in-numru ta’ ġranet maħdumin fl-interpretazzjoni konsekuttiva u/jew simultanja u l-lingwa speċifika li interpretajt lejha/minnha)

• Ittri ta’ referenza li jispeċifikaw in-numru ta’ ġranet u n-natura tad-doveri

• Fotokopji ta’ fatturi b’deskrizzjoni ċara tat-tip ta’ xogħol

Esperjenza bħala interpretu ta’ qorti, interpretu ta’ kollegament, interpretu ta’ servizz pubbliku jew interpretu ta’ kumpanija ma tgħoddx bħala esperjenza fl-interpretazzjoni tal-konferenzi. L-esperjenza professjonali dikjarata biss fis-CV mhix suffiċjenti. Il-prova tal-esperjenza għandha tindika wkoll il-kombinazzjonijiet lingwistiċi u d-direzzjonijiet li ġejt impjegat biex tinterpreta lejhom/minnhom. Barra minn hekk, id-dokumenti ta’ sostenn meħtieġa kollha għandhom ikunu fil-file tiegħek sad-data ta’ skadenza tal-applikazzjoni (ara l-kalendarju).

L-interpreti li għandhom is-Serb, il-Bożnijak u l-Montenegrin bħala lingwa A se jingħataw biss akkreditazzjoni interistituzzjonali abbażi ta’ test interistituzzjonali.

L-istatus tal-interpreti li huma diġà fuq il-lista se jibqa’ l-istess. Kull tibdil għal lingwi attivi jew passivi se jsir skont il-proċeduri kurrenti. Ir-rikonoxximent tal-Kroat, is-Serb, il-Bożnijak u l-Montenegrin bħala lingwi C addizzjonali jista’ jkun ikkunsidrat abbażi ta’ każ każ b’evidenza bil-kundizzjoni li l-kandidat diġà għandu waħda minn dawn il-lingwi bħala C fil-kombinazzjoni tagħhom. Jekk għandek xi mistoqsijiet dwar dan ibgħatilna email.

Le, f’sena tat-test partikolari tista’ tiġi rreġistrat u ttestjat biss b’lingwa A waħda. Jekk diġà applikajt, tista’ tbiddel il-lingwa A tiegħek qabel id-data ta’ skadenza applikabbli billi tibgħatilna email.

Meta tkun applowdjajt il-file tiegħek, tintbagħatlek konferma tar-riċevuta.

Il-Kumitat tal-Iskrinjar se jivvaluta l-applikazzjoni tiegħek u jiddetermina jekk id-dokumenti tiegħek humiex adegwati. Tista’ teditja jew tapplowdja d-dokumenti tal-profil tiegħek fi kwalunkwe ħin fl-applikazzjoni tiegħek. Madankollu, il-Kumitat tal-Iskrinjar se jqis biss id-dokumenti applowdjati sal-iskadenza mogħtija għall-applikazzjonijiet.

Hi r-responsabbiltà tiegħek li tiżgura li:

• il-kwalità tal-file applowdjat hi tajba

• il-kombinazzjoni tal-lingwa tiegħek tissemma fuq dokument uffiċjali (jekk il-kombinazzjoni tal-lingwa ma tkunx iddikjarata fuq iċ-ċertifikat ta’ lawrja/diploma tiegħek trid tiġi ddikjarata fuq xi dokument uffiċjali universitarju ieħor eż. suppliment għad-diploma, traskrizzjoni, ċertifikat ta’ kisba)

• l-għarfien u l-livell tal-lingwi tiegħek li mhumiex koperti minn lawrja jew diploma huma dokumentati kif suppost (eż. ċertifikati, stqarrijiet personali, esperjenza ta' xogħol rilevanti).

• il-kwalifiki tal-eżamijiet tal-interpretazzjoni tiegħek huma preżenti fil-file

• fejn applikabbli, il-prova meħtieġa ta’ mill-inqas 100 jum ta’ esperjenza ta’ xogħol bħala interpretu tal-konferenzi hija preżenti fil-file

Jekk tinsab fl-aħħar sena ta’ studju tiegħek:

• iżda għadek trid tirċievi kopja tad-diploma jew tal-lawrja finali fl-interpretazzjoni tal-konferenzi, trid tapplowdja ċertifikat uffiċjali mill-università tiegħek li jiddikkjara li għaddejt l-eżamijiet kollha meħtieġa.

• jekk għaddejt mill-eżamijiet ta’ interpretazzjoni kollha meħtieġa, iżda għadek qed tiffinalizza d-diploma jew il-lawrja tiegħek fl-interpretazzjoni tal-konferenzi, jekk jogħġbok applowdja ċertifikat uffiċjali mill-università li jiddikjara li inti għaddejt mill-eżamijiet tal-interpretazzjoni kollha meħtieġa biex tikseb id-diploma jew il-lawrja tiegħek.

• jekk għad trid tagħmel l-eżamijiet tal-interpretazzjoni tiegħek, trid tapplowdja ċertifikat ta’ reġistrazzjoni jew prova li qed ittemm il-lawrja tiegħek. Mill-inqas ġimagħtejn qabel il-jum tat-test simultanju trid tapplowdja ċertifikat uffiċjali jew traskrizzjoni mill-bord tal-eżamijiet universitarju jew postgradwatorju tiegħek li tiċċertifika li inti għaddejt mill-eżamijiet tal-interpretazzjoni meħtieġa biex tikseb id-diploma jew il-lawrja tiegħek.

Jekk tgħaddi mit-test ta’ akkreditazzjoni, ma tkunx akkreditat qabel ma tissottometti l-kopja tad-diploma jew tal-lawrja finali tiegħek.

Jekk l-applikazzjoni tiegħek titqies eleġibbli, kull informazzjoni dwar l-istedina għal test ta’ akkreditazzjoni tintbagħatlek fil-kont online tiegħek mill-Uffiċċju tat-Testijiet Interistituzzjonali tal-Kummissjoni Ewropea. Kun ċert li tiċċekkjah b’mod regolari.

Se tirċievi l-ispeċifikazzjonijiet tekniċi meħtieġa, u qabel it-test simultanju se tiġi mistieden biex tagħmel mock test; il-mock test huwa obbligatorju u jippermettilek tiffamiljarizza ruħek mal-għodda u tiċċekkja jekk tissodisfax ir-rekwiżiti tekniċi.

Hi r-responsabbiltà tiegħek li tiċċekkja wkoll il-kont tal-email tiegħek għal notifiki importanti – iċċekkja li l-indirizz “csi-tests@ec.europa.eu” mhux ittrattat bħala spam.

It-testijiet kollha se jiġu organizzati mill-bogħod permezz ta’ pjattaforma tal-ittestjar mill-bogħod. L-ewwel se tkun mistieden tirrekordja l-prestazzjoni tal-interpretazzjoni simultanja tiegħek għal-lingwi kollha ttestjati; se tiġi mistieden biex tagħmel it-test konsekuttiv biss jekk tgħaddi mit-test simultanju. Il-kandidati mistiedna għat-test konsekuttiv se jiġu infurmati b’email mis-Servizz tat-Testijiet tal-Parlament Ewropew. Jekk jogħġbok iċċekkja li l-indirizz LINC.accr-tests@europarl.europa.eu mhux ittrattat bħala spam.

Kull komponent tat-test huwa eliminatorju. Għat-test simultanju, skont l-eżitu tad-deliberazzjonijiet tal-Bord tas-Selezzjoni u l-profil lingwistiku minimu meħtieġ, l-evalwazzjonijiet jistgħu jitwaqqfu qabel ma jiġu vvalutati l-komponenti kollha tat-test.

Għat-testijiet konsekuttivi, se jittieħdu u jiġu vvalutati l-komponenti tat-test kollha meħtieġa, irrispettivament minn kull eżitu individwali. Ir-riżultati tat-testijiet globali u individwali se jiġu kkomunikati mill-Bord tas-Selezzjoni ladarba l-komponenti tat-test kollha jkunu ttieħdu u ġew ivvalutati. Jekk ma teħel minn xi wieħed mill-komponenti tat-test konsekuttivi meħtieġa, il-komponenti tat-test simultanju u konsekuttiv li tkun għaddejt minnhom se jiġu riportati għal sessjoni ta’ resit. Ir-resit se jiġi organizzat fl-istess sena tat-test jew ċiklu ta’ testijiet u se tiġi offrut tentattiv wieħed ġdid biex tgħaddi mill-komponent(i) tat-test konsekuttiv li ma tkun weħilt minnu/minnhom. Jekk tonqos milli tikseb il-profil lingwistiku minimu għall-akkreditazzjoni fl-istadju tar-resit, ma jkunx possibbli li l-komponenti tat-test li tkun għaddejt minnhom jiġu riportati għal xi test li jsir fil-futur. Is-Servizz tat-Testijiet tal-Parlament Ewropew jorganizza r-resits. Għar-resit tat-test konsekuttiv, skont ir-riżultati tad-deliberazzjoni, il-Bord tas-Selezzjoni se jwaqqaf l-evalwazzjoni hekk kif inti ma tkunx tista’ tissodisfa aktar xi wieħed mill-profili ta’ akkreditazzjoni meħtieġa.

Se tirċievi r-riżultat bil-miktub flimkien mal-feedback, li permezz tiegħu se tifhem kif mort f’kull wieħed mill-kriterji tal-evalwazzjoni.

Jistgħu japplikaw arranġamenti differenti f’testijiet għal lingwi mhux tal-UE.

Il-Kumitat tal-Iskrinjar jiddeċiedi liema lingwi se jkunu ttestjati, billi jagħżilhom mil-lingwi li int iddikjarajt fl-applikazzjoni tiegħek. Din l-għażla ma tistax tinbidel. Jekk jogħġbok innota li, għal raġunijiet organizzattivi, l-ordni tal-lingwi ttestjati hi fissa u ma tistax tinbidel.

Jekk jogħġbok iddikjara d-diżabbiltà tiegħek billi tuża l-formola pprovduta fl-applikazzjoni online, billi tinkludi kull ħtieġa għal assistenza jew tagħmir speċjali kemm għat-test konsekuttiv kif ukoll għat-test simultanju.

Se jsir kull sforz biex isirulek arranġamenti biex tkun ittestjat fl-aħjar kundizzjonijiet possibbli, filwaqt li tinżamm il-parità bejn il-kandidati.

Il-Bordijiet tas-Selezzjoni huma magħmulin minn interpreti tal-konferenzi tal-istaff mit-tliet servizzi tal-interpretazzjoni tal-istituzzjonijiet tal-UE (il-Kummissjoni Ewropea, il-Parlament Ewropew u l-Qorti tal-Ġustizzja tal-Unjoni Ewropea). Skont il-kombinazzjoni ta’ lingwi ttestjati, jista’ jkun hemm interpreti oħrajn involuti bħala assessuri biex jassistu l-Bord tas-Selezzjoni fl-evalwazzjoni tiegħu.

Inti tista’ tissottometti talba għal rieżami permezz tal-formola pprovduta fil-kont online. It-talbiet għar-rieżami għandhom ikunu motivati u jridu jintbagħtu fi żmien 5 ijiem kalendarji mid-data li fiha l-ittra bid-deċiżjoni tal-Kumitat tal-Iskrinjar, jew tal-Bord tas-Selezzjoni, tkun intbagħtitlek online.

Ma tistax tikkontesta l-valutazzjoni tar-rilevanza tal-kwalifiki jew l-esperjenza professjonali tiegħek jew il-kwalità tal-prestazzjoni tiegħek fit-test. Din il-valutazzjoni hija ġudizzju ta’ valur u, għalhekk, talba għal rieżami sottomessa fuq din il-bażi mhux se twassal għal eżitu pożittiv.

Sempliċi talbiet għal feedback addizzjonali mhux se jiġu ttrattati bħala talba għar-rieżami; dawn se jiġu miċħudin u l-Bordijiet tas-Selezzjoni mhux se jipprovdu aktar feedback.

Kull komunikazzjoni f’dan il-kuntest għandha tintbagħat lill-Uffiċċju tat-Testijiet; jekk jogħġbok tikkomunikax b'mod dirett u individwali mal-membri tal-Kumitat tal-Iskrinjar jew tal-Bord tas-Selezzjoni.

Iva, tista’ terġa’ tapplika, jekk ma tkunx weħilt minn test ta’ akkreditazzjoni tliet darbiet (in-nuqqas ta’ attendenza mingħajr raġuni ġustifikata tgħodd bħala li m’għaddejtx). Ħlief jekk ikun mitlub mill-interess tas-servizzi, qabel ir-raba’ applikazzjoni (u kull waħda sussegwenti) tkun tista’ tiġi aċċettata, għandu japplika perjodu ta’ stennija ta’ ħames snin ta’ testijiet.

Jekk tgħaddi mill-komponenti tal-interpretazzjoni kollha tat-test tiegħek u tkun issodisfajt il-kundizzjonijiet amministrattivi kollha, se tiżdied mal-lista tal-interpreti akkreditati tal-ACI għall-Istituzzjonijiet Ewropej. ACIs akkreditati huma offruti kuntratti skont il-ħtiġijiet ta’ kull istituzzjoni. Jekk jogħġbok innota li l-inklużjoni fil-lista ta’ interpreti akkreditati mhix garanzija ta’ reklutaġġ.

Jekk jogħġbok innota wkoll li jekk għandek relazzjoni kuntrattwali kontinwa mal-Istituzzjonijiet tal-UE (eż. bħala trainee, aġent kuntrattwali, aġent temporanju jew uffiċjal), ma tistax tiżdied mal-Lista Konġunta qabel ma jintemm il-kuntratt tiegħek. Għal aktar informazzjoni, ara l-Proċedura dwar l-istatus tal-ACI fil-Lista Konġunta.

Le. Ir-reklutaġġ għal post ta’ staff permanenti hi biss possibbli permezz tal-kompetizzjonijiet.

L-istituzzjonijiet Ewropej joffru bosta riżorsi biex tiġi pprattikata l-interpretazzjoni:

• Għodda ta’ Taħriġ għall-Interpretazzjoni tal-Kummissjoni Ewropea

Għal mistoqsijiet dwar it-testijiet konsekuttivi: LINC.accr-tests@europarl.europa.eu

Għal aktar mistoqsijiet: csi-tests@ec.europa.eu